Canto notturno di un pastore errante dell'Asia (G. Leopardi). Versione in lingua sarda

Ite aches, tue, luna, in chelu? Narami, ite aches,

mutigosa luna?

Naschis su sero, e moves,

amirande sos desertos; e ti reulas.

Galu non ses istraca

de s’anda e torra in cussu eternu chelu?

E non ti venit a ifadu, e galu ti disitzas

de mirare custas baddes?

Assimitzat a sa vida tua

sa vida de su pastore.

Essit a primu albore

movet sa roba foras de tanca, e bidet

tatzos, funtanas e erbas;

e istracu si pasat a su sero:

e nudd’ateru disitzat.

Narami, o luna: a ite balet

a su pastore sa vida sua,

sa vostra vida a bois? Narami: a umbe mirat

custu curtzu andariolare meu

e su mover tuo chene vine?

Vetzu, pilicanu, istracu

male chintu e iscurtzu

e chin d’un’asche manna de linna a coddu

in montes,  baddes

perdiarjos, arenarjos, furestas

ventu, tempestas, e cando li cajentat

s’ora, e cando poi astraorat

curret bia, curret, abramat

acabulat orrojas e istainos

urrughet, risorghet, e prus e prus s’apressat

chene asseliu e ristoru,

istratzoladu, sambenande, infinis c’arribat

a su logu ch’it mirande

e umbe su tantu fadigare bortaiat:

ispentumu orrorosu, immensu,

umbe issu ispentumande, totu cantu l’iserghiat.

Vìrgine luna, tale

est sa vida mortale.

S’omine naschit a gherra

e su naschire a custa vida isposat morte.

Provat pena e turmentu

in su momentu; e in su matessi tempus

sa mamma e su babbu

lu cossolana a sa vida chi est naschidu.

E cando benit creschende,

ambos e duos lu sustenint, e pro semper

in atos e allegas

chircant de l’acoratzire,

e de l’imbiare a sa resone:

chi l’est che grassia manna

agradeschida dae sa bella erentzia issoro.

Ma pro ite dare sa vida

a ite mantenner in vida

si a pustis tocat de la cufortare?

Si sa vida est isagura

pro ite la sustenimus?

Luna tzeniosa e bella, gai

est s’andala mortale.

Ma de mortu tue non ses,

e fortzis de su narrer meu non ti nde abales.

Si puru, sola, e semper in biatzu

e in pensamentu, fortzis intendes

custa nostra vida

su contiveriu nostru, sue suspirare, chi siat:

chi siat custu morrer, custu soberanu

istramudire de cara

e bessire dae sa terra, e benner mancu

a donzi comuna, geniosa cumpagnia.

E tue, tzertu, cumprendes

su ghetu de custas cosas, e bies su frutu

de su mantzanu, de su sero

e de su tzeniosu andare de su tempus.

Chi tue lischis, de tzertu, a cale durche amore

ridat su veranu;

a chie li profetat s’istiu: e a ite li servit

s’jerru fritoridu.

Milli cosas lischis tue, e milli nd’iscuperis

chi cuadas li sunt a su pastore.

E cada tantu chi t’amiro

istande muda supra de sa campura deserta

chi, a s’oritzonte, cunfinat in su chelu;

o vintzas cun su tatzu de roba mea

sichindemi viatzande a manu a manu;

e cando in chelu miro vampas de isteddos;

mi naro intro pensande:

a ite totu custos lugoreddos?

Ite achet s’aghera chene fine, e cussu prufundu

infinidu serenu? Umb’est su sensu de custu

desertu immensu? E deo ite so?

Goi pro cussu resono. E de su locu

chene fine e mancu modu

chin solu sos isteddos chene conta,

chi in tantu afannu, e tanta movitia

de cada tzeleste, onzi terrena cosa

mulinande chene pasu

pro torrare semper dae umbe sun partias;

usu perunu e nen frutu

de li dare ghetu, non resesso. Ma tue de tzertu

giovinedda immortale, connosches totu cantu.

Custu deo lisco e mi sento

chi de sos eternos tziros

e de sa mea dilichesa

carchi vene o cuntentesa

fortzis atere at a tenner; ca pro mene, vida mi dat male.

Oh tatzu de roba mea pasande, oh, tue si chi ses biada

e sa miseria tua, credo, non connoscas!

Cantu imbidia chi ti tentzo!

Non solu pro ca dae s’afannu

belle istoiga ti c’andas

e donzi istentu, dogni dannu

e donnia reselu andas in presse irmenticande;

e mancu mai t’intendes infadande.

Cando t’imbolas in s’umbra, supra de s’erva

tue semper ses chieta e cuntenta;

e grandi parte de annu

chene cumbata peruna colas tempus.

E finas deo sedo supra s’erva, in s’umbra

e unu vastitzu achet pesare

sa mente, e un’ispronada casi mi punghet

chi finas setzende: che so semper innedda

dae mi bider in pache o in asseliu.

E nudd’ateru disitzo

e in resone non mi sento de prantu.

Su chi tue gudis e cantu

non isco narrer; ma afortunada ses.

E deo so gudinde pacu abberu

o tatzu de roba mea, non de custu solu mi lamento.

Si solu dias poder allegare, ti dia tando dimandare:

- Narami: aghite si dispostu

in bellu pasu

s’apaniat donzi animale:

e si mi pontzo ego a pasare, su vastitzu si nd’abbalet? –

Fortzis si avio apiu sas alas

de poder volare supra de sas nues

e contitzare sas istellas una a una

o che su tronu chi vat de punta in punta de monte

prus cuntentu dio esser, durche e bellu tatzu de roba mea

prus cuntentu dio esser, crara e bella luna.

O fortzis, che so innedda dae su veru

amirande ateras sortes, in custu pessu meu:

fortzis in cada ghetu, siat

intro de sa cala o sa chillia

a donnia modu, male, imbuscat su nadale.

                                                                       Mamoiada, 10 ottobre 2015